گھر میں رزق کی چہل پہل اور نمازی بن گیا:محترم حضرت حکیم صاحب السلام علیکم!میں احمدپورشرقیہ کی قریبی بستی میں رہائش پذیر ہوں‘ پہلے ہم بہاولپور رہتے تھے مگر پانچ سال پہلے میری شادی ادھر ہوئی اور پھر کاروبار بھی احمدپور شرقیہ میں شروع کیا تو رہائش کا انتظام بھی سسرالی گھر کےقریب ہی کرلیا۔ شادی کے بعد بے شمار مسائل کا سامنا کرنا پڑا‘ قرض لیکر کاروبار شروع کیا جو نہ چل سکا‘گھر میں فاقے شروع ہوگئے‘ قریب ہی سسرال کا گھر تھا اکثر سالن روٹی ادھر سے آجاتی اور ہم دونوں کھالیتے‘میری ہمسائی نے میری بیوی کو ’’عبقری حویلی‘‘ کے متعلق بتایا جو کہ میرے گھر سے صرف آٹھ کلومیٹر دور تھی‘ میری بیوی نے مجھ سے بات کی اور اگلے دن ہم دونوں اپنے مسائل کے حل کیلئے عبقری حویلی روانہ ہوگئے۔ میں یہ بتاتا چلوں کہ مجھے یاد نہیں میں نے کبھی زندگی میں نمازجمعہ بھی ادا کی ہوگی‘ مگر پھر بھی عبقری حویلی پہنچا‘ وہاں جاکر بتائے گئے اعمال کیے‘ میری بیوی پڑھی لکھی ہے اس نے نوافل وغیرہ ادا کیے جبکہ میں دوسرے اعمال کرتا رہا‘ واپس آتے ہوئے اپنے مسائل کے حل کیلئے گیارہ کیل والا عمل کیا۔ اللہ کے ہاں دعا کی اور واپس آگئے‘ نجانے وہاں کیا بات تھی بہت سکون تھا‘ دل مطمئن تھا‘ اس سے پہلے بھی مختلف جگہوں پر گئے مگر وہاں بے سکونی تھی اور وہ لوگ پیسے مانگتے تھے مگر عبقری حویلی میں ہمیں بہترین لنگر دیا تھا‘ واپسی پر دم شدہ پانی اور نمک ملا‘ گیارہ کیل کا عمل کیا اور کسی قسم کی رقم کا ہدیہ‘ نذرانہ‘ شکرانہ کا تقاضا نہ ہوا۔میں ہر اتوار کو عبقری حویلی جانا شروع ہوا‘ اب الحمدللہ وہاں ہلکی پھلکی خدمت بھی کرتا ہوں‘ ذکر بھی کرتا ہوں‘ سب سے بڑھ کر مجھے نماز مل گئی‘ ذکر مل گیا‘ اللہ سے مانگنا آگیا اور ہاں گھر میں رزق کی چہل پہل ہوگئی۔ پہلے کرائے کے مکان میں تھا اب چھ ماہ کے اندر اندر اپنا تین مرلے کا پلاٹ بھی لے چکا ہوں ان شاء اللہ بہت جلد تعمیرکرکے ادھر شفٹ ہوجاؤں گا۔ محترم حکیم صاحب میرا نام اور محلے یا علاقہ کا نام شائع ہرگز نہ کیجئے گا۔ (پوشیدہ)
بیمار شوہر صحت مند ہوگیا: میرے شوہر گزشتہ8سال سے بیمار تھے‘ کاروبار تباہ کرچکے تھے‘ اب تو یہ حال تھا کہ گھر میں ہیں تو ٹھیک جیسے ہی گھر سے باہر نکلے طبیعت خراب‘ہمارے چچا کے بیٹے نے عبقری حویلی کے متعلق تفصیل سے بتایا‘ میں نے اپنے بیٹے کو تیار کیا اورشوہر کو لے کر عبقری حویلی گئے‘ ہم تقریباً تین مہینے ہرجمعرات کووہاں جاتے رہے‘مغرب سے پہلے واپس آجاتے‘ اللہ کا شکر ہے وہاں کرنے والے اعمال کی وجہ سے میرے شوہر بالکل ٹھیک ہوگئے اور آٹھ سال پرانی بیماری اور جادو ختم ہوگیا۔ (ج، دنیاپور)